ភ្នំពេញ៖ អតីតឯកអគ្គរាជទូតកម្ពុជាប្រចាំនៅប្រទេសព្រុយណេ លោក ហុក សុភា ត្រូវបានរាជរដ្ឋាភិបាលកម្ពុជាប្រកាសតែងតាំងជាអគ្គនាយករងនៃក្រុមស្រាវជ្រាវ វិភាគ និងព្យាករណ៍នៃក្រសួងការបរទេស និងសហប្រតិបត្តិការអន្តរជាតិ។

ក្រៅពីនោះ លោកស្រី ហូយ លេណា អតីតអគ្គកុងស៊ុលប្រចាំទីក្រុងណាននីង ក៏ត្រូវបានតែងតាំងជាអគ្គនាយករងនៃអគ្គនាយកដ្ឋាន អឺរ៉ុប អាមេរិក និងអាហ្វ្រិក-មជ្ឈិមបូព៌។

បើយោងតាមអនុក្រឹត្យរបស់រាជរដ្ឋាភិបាលចុះនៅថ្ងៃទី០៥ ខែធ្នូ ឆ្នាំ២០២២ មន្ត្រីការទូតជាន់ខ្ពស់នៃក្រសួងការបរទេសចំនួន៤រូបផ្សេងទៀត ក៏ត្រូវបានតែងតាំងមុខតំណែងថ្មីផងដែរ ក្នុងនោះ លោក ហ៊ុលក្រង ផាណង ទទួលតំណែងជាអគ្គលេខាធិការរង នៃអគ្គលេខាធិការដ្ឋានទទួលបន្ទុកពិធីការ។ លោក ឥន សុផល ទទួលតំណែងជា អនុប្រធានវិទ្យាស្ថានជាតិការទូត និងទំនាក់ទំនងអន្តរជាតិ។ លោក ហ៊ុន ហាន ទទួលតំណែងជា ប្រធាននាយកដ្ឋានពិធីការ និងតែងតាំង លោក ខៃ លន ជាប្រធាននាយកដ្ឋានសវនកម្មផ្ទៃក្នុង៕